Artistët e punësuar në institucionet publike kulturore të vendit mund të përfitojnë trajtim financiar pas ndërprerjes së veprimtarisë artistike skenike. Sipas projektligjit të propozuar, akrobatët, balerinët dhe valltarët mund të përfitojnë trajtim financiar në msohën 47-vjeçare, ndërsa këngëtarët solistë dhe të korit kanë këtë të drejtë në moshën 57-vjeçare. Masa e trajtimit financiar është 70 për qind e pagës bruto mujore për një periudhë 5-vjeçare dhe më pas 50 për qind deri në datën e lindjes së të drejtës për pensionin e pleqërisë, pensionin e invaliditetit ose pensionin familjar. Ky draft përshkruhet si një mekanizëm për të mbuluar periudhën ndërmjet përfundimit të karrierës aktive në skenë dhe pensionit, duke marrë parasysh kërkesat fizike dhe vokale të këtyre profesioneve. Projektligji parashikon mundësinë e angazhimit të tyre, me kërkesë të institucionit dhe pa shpërblim shtesë, deri në 250 orë në vit kalendarik, në veprimtari trajnuese, promovuese, artistike, kulturore. Ky projektligj, që aktualisht është hedhur në konsultim publik, pritet të hyjë në fuqi në 1 janar 2027 dhe parashikohet të ketë një kosto rreth 50.8 milionë lekë në Buxhetin e Shtetit për periudhën 2027-2029. Trajtimi financiar ka qenë një kërkesë e vazhdueshme e artistëve dhe pritet të ofrojë më shumë siguri ekonomike dhe më shumë kushte për ruajtjen dhe transmetimin e përvojës së tyre profesionale edhe pas përfundimit të veprimtarisë së rregullt skenike.