Pas Beogradit, Ndihmës sekretari i shtetit amerikan për Evropën dhe Euroazinë, James O'Brien ka qëndruar në Prishtinë. Të hënën ka takuar kryeministrin e Kosovës, Albin Kurtin, për rreth dy orë e gjysmë. Nga zyra e të parit të Qeverisë, njoftuan se përpos bashkëpunimin mes të dyja vendeve në takim është diskutuar edhe për raportet mes Kosovës dhe Serbisë, procesit të dialogut dhe zbatimin e marrëveshjes bazike për normalizim të marrëdhënieve, për çka Kosova kërkon nënshkrimin e saj nga Serbia si dëshmi për zbatim të saj. "Nënshkrimi i Marrëveshjes Bazike është dëshmia e nevojshme e vullnetit të mirë dhe mirëbesimit nga ana e Serbisë për përmbushjen e shpejtë dhe respektimin e plotë të saj e të Aneksit të zbatimit", thuhet në njoftim, ku po ashtu u bë e ditur se Kurti në këtë takim ka theksuar se për paqe e siguri, nevojitet dorëzimi i organizatorit të sulmit terrorist të Banjskës Milan Radoiçiq dhe grupit të tij. Nga ndihmës sekretari për Evropën, James O'Brien nuk pati asnjë njoftim për takim. Megjithatë, pas takimit të një dite më parë në Beograd me presidentin serb, Aleksandar Vuçiç ai kishte theksuar se duhet të respektohen të gjitha marrëveshjet e arritura në Bruksel mes palëve. O'Brien po ashtu ka thënë se themelimi i Asociacionit të Komunave me shumicë serbe është hap i rëndësishëm, për çka thekson se duhet të kalojë një draft në Gjykatën Kushtetuese të Kosovës. Ndihmës sekretari, James O'Brien ka deklaruar se për shkak të moskoordinimit të Qeverisë së Kosovës me Shtetet e Bashkuara të Amerikës, Kosova u ndëshkuar nga shtetet evropiane me mos anëtarësim në Këshillin e Evropës këtë vit.