Shqyrtimi i Ligjit për Buxhetin e vitit 2025 e riktheu kryeministrin e Kosovës, Albin Kurtin në sallën e kuvendit, pas muajsh mungesë. Para deputetëve, kreu i ekzekutivit e cilësoi si “historik” buxhetin e vitit të ardhshëm. Për Kurtin, buxheti për vitin tjetër reflekton rritjen më të lartë të bruto produktit vendor, rritjen 13% e buxhetit për pagat dhe shtesat, 3.2% rritje për mallrat dhe shërbimet, për subvencione dhe transfere 8.75% dhe 8% për investimet kapitale. Në këtë buxhet e kemi prioritet arsimin e shëndetësinë por edhe infrastrukturën e mbrojtjen. Ky buxhet ka shumë detaje e specifika tjera por që në vijim do të keni mundësi ti dëgjoni nga ministrat e linjës. E kemi prioritet zhvillimin e qëndrueshëm ekonomik, vazhdimin e krijimit të vendeve të reja të punës dhe rritjen e mirëqenies për të gjithë, për vitin e ardhshëm presim që rritja ekonomike të arrijë në 5.6% të bvp. Për Kurtin, qeverisa e tij katër vjeçare siguroi mirëqenie për kategoritë sociale e rriti punësimin me 78 mijë vende pune. Por, opozita argumentoi të kundërtën, në seancën e së hënës ata shprehën pakënaqësitë me projektbuxhetin e vitit 2025 duke e parë si varfërues për qytetarët e për ekonominë e vendit. Ne flasim për një planifikim buxhetor i cili nuk ndikon asgjë, nuk promovon asgjë, një planifikim prej të cilit ky shtet e ky popull nuk sheh kurrfarë hajri, sepse e kemi parë që nga fillimi i kësaj qeverise, ku çdo planifikim shihet se është i dobët sepse në realizim të çdo projekti ishte i keq dhe nuk ka sjellë asnjë produkt e asnjë investim kapital që të mbahet mend. Ky buxhet ka së paku dy shkelje ligjore te tatimi në pronë dhe te ligji i pagave, ky buxhet tregon abuzimin e qeverisë me autorizimet e veta ligjore, në veçanti duke lënë zëra të paspecifikuar në buxhet tek subvencionet dhe zërat, por e mira është që ky buxhet është tranzitor dhe besoj se dakordohemi të gjithë për këtë pjesë Po flasim pak për ekonominë, po është rritë ekonomia, është e vërtetë, 240 milionë euro ua keni dhënë dostave të juaj përmes tenderëve një burimor, krejt çka mund të flasim për këtë vit, për këtë mandat është që kjo është qeveria e vetme në historinë e Kosovës me numrin më të lartë të tenderëve njëburimor Seanca për shqyrtimin në lexim të parë të ligjit për buxhetin përballi edhe ministrin e financave, Hekuran Muratin me deputetët opozitar rreth rritjes së çmimeve, tarifave të energjisë elektrike e investimet kapitale. Asnjëherë, as ju dhe as kryeministri nuk i keni përmend rritjen e çmimeve, 22% janë rritë çmimet qytetarëve, por çmimi i bukës është rritë me 50%, ke ardhë në pushtet duke premtu që ke me e liru faturat e energjisë elektrike, tarifën e ulët e ke rritë prej 3 centëve në 7 centë, tarifën e ke rritë prej 7ve në 14 centë dhe çka ke bo, ke thanë që hajde se po ua subvencionoj disave disa fatura, keni dështuar Sa i përket çmimeve të ushqimeve, çmimi i grurit është 20 centë për kilogram dhe në bursa botërore, shikojeni është sikurse pandemisë, merre dhe shikone, çmimi i vajit shikone sipas ASK-së është 1.40 centë për litër, dmth çmimet bazë për bukën kanë rënë, por çmimi i bukës nuk po bjen athu pse, sepse ligjin për çmimet tavan e keni bllokuar në gjykatën kushtetuese, qytetarët vazhdojnë me pagu më shtrenjtë për shkak tuajin Opozita në fillim të seancës deklaroi se nuk do e votojë Ligjin për Buxhetin e vitit 2025. Pushteti, në orët e mbrëmjes me 59 vota e kaloi në lexim të parë projektligjin.