Ministri izraelit i Mbrojtjes, Israel Katz, ka thënë se “nuk do të ketë armëpushim apo pezullim të luftimeve në Liban” derisa të arrihen objektiva e luftës. Në një postim në platformën X, Katz theksoi se veprimet ofensive të Izraelit “duhet të vazhdojnë të dobësojnë kapacitetet e Hezbollahut dhe të arrijë fitore”. “Do të vazhdojmë të sulmojmë Hezbollahun me të gjitha kapacitetet derisa objektivat e luftës të arrihen”, shtoi Katz. “Izraeli nuk do të pajtohet me çfarëdo marrëveshje që nuk garanton parandalimin e terrorizmit dhe derisa të arrihen qëllimet e luftës në Liban, përfshirë çarmatosjen e Hezbollahut duke i dëbuar përtej lumit Litani dhe të lejohen banorët e veriut të kthehen të sigurt në shtëpitë e tyre”, tha ministri i Mbrojtjes. Jo më larg se dje, një sulm ajror izraelit ka shkatërruar një shtëpi në veri të Libanit, duke vrarë të paktën tetë persona dhe duke plagosur 14 të tjerë, tha Ministria e Shëndetësisë e Libanit më 11 nëntor. Ekipet e shpëtimit dolën në vendngjarje për të shpëtuar njerëzit e bllokuar nën rrënoja, raportoi media shtetërore e Libanit. Ushtria izraelite nuk ka komentuar për këtë sulm dhe është e paqartë se cili ishte caku i tij.