Grupi G7 i kombeve më të pasura, ka nënshkruar sot marrëveshjen madhore që sipas tyre, shmang abuzimet taksore nga korporatat gjigande multinacionale, duke përcaktuar për herë të parë taksën minimale globale për korporatat. Ministrat e financave të shtatë ekonomive më të pasura pranuan marrëveshjen sot në bisedimet në Londër, njoftoi kancelari britanik Rishi Sunak. Si pjesë e planit ministrat pranuan masën minimale globale taksore prej të paktën 15% në çdo vend ku ato operojnë. Sunak tha: “Kjo reformë e gjerë taksore është diçka që Britani kishte kërkuar prej kohësh, dhe krijon një sistem taksor më të drejtë, siç i ka hije shekullit të 21-të”. “Është një marrëveshje historike dhe unë jam krenar që G7 tregoi udhëheqje kolektive në një periudhë vendimtare të ekonomisë botërore”. Marrëveshja konsiderohet si eliminuese e politikave të konkurrencës mes vendeve, sipas të cilës korporatat multinacionale vinin në garë me njëra-tjetrën vendet ku operonin, për uljen e nivelit të taksave me qëllim krijimin e vendeve të punës. Bizneset gjigande digjitale si Amazon, Google e Facebook, përfshihen nga marrëveshja e re, të cilat më parë deklaronin vetëm fitime të vogla në vendet ku operonin.