Sistemi i monitorimit satelitor të NASA-s ka publikuar imazhe të frikshme të përhapjes së zjarreve në të gjithë pellgun e Mesdheut. Çdo pikë e kuqe e paraqitur në hartën e NASA-s shënon vendndodhjen e një zjarri aktiv, duke krijuar një det të kuq nga Evropa Jugore deri në Afrikën e Veriut. Harta tregon zjarret nga Greqia në Spanjë, nga Franca jugore në Qipro, nga Italia në Shqipëri ku po digjen pyje dhe zona të mëdha të gjelbërta. Po ashtu në pamje satelitore shfaqet Turqia deri në Afrikën e Veriut, ndërsa theksohet se ditët e fundit për të gjithë rajonin e Mesdheut kanë regjistruar ditët më të nxehta. Imazhet e regjistruara nga NASA tregojnë zhvillimin e zjarreve sipas kohës, ato që janë aktive sot, ato të regjistruara në 24 orët e fundit, dhe ato që kanë ndodhur gjatë 7 ditëve të fundit. Disa prej pikave gjithashtu mund të tregojnë edhe aktivitete njerëzore, si për shembull djegie të kontrolluar nga fermerët në tokat e tyre, por edhe shpërthime që lidhen me luftën në Ukrainë.