Autoritetet në Kosovë mbyllën të premten komunat paralele serbe në veri të vendit, në një veprim që rrezikon të nxisë tensione të reja, në një kohë kur qeveria e Kosovës është kritikuar nga diplomacia perëndimore për hapa të njëanshëm në zonë. Policia e Kosovës bëri të ditur se operacioni në katër komuna u zhvillua për të ndërprerë veprimtaritë në objektet që janë shfrytëzuar në cilësinë e komunave ilegale, e të cilat janë në kundërshtim me rendin juridik kushtetues”. Ministri i Pushtetit Lokal, Elbert Krasniqi, tha se “janë mbyllur institucionet paralele ilegale të vetëqeverisjes Lokale, të cilat kanë funksionuar nën direktivat e Serbisë duke cenuar kushtetutshmërinë dhe ligjet e Republikës së Kosovës”. Pas aksionit në katër komunat veriore, reagoi kryetari i Listës Serbe Zlatan Elek dhe shefi i ekipit negociator serb, Petar Petkoviç. “Kaosi që u krye sot nga Albin Kurti në të katër komunat në veri të Kosovës do të ketë pasoja të gjera për normalizimin e marrëdhënieve ndërmjet Beogradit dhe Prishtinës dhe mund të shkaktojë konflikt në veri në Kosovë ose një përshkallëzim të ri të situatës”, ka thënë Petkoviç. Më herët gjatë këtij viti, autoritetet mbyllën shtatë komuna të tjera paralele serbe në pjesë te tjera të vendit. Në fillim të muajit gusht autoritetet mbyllën Postën e Serbisë në veri dhe shpalosën planet për të hapur urën kryesore mbi lumin Ibër në Mitrovicë për trafikun e makinave.