Kuvendi miratoi dekretin e Presidentit të republikës për emërimin e Taulant Ballës në postin e ministrit të Brendshëm. Pro zgjedhjes së Ballës votuan 75 deputetë, 16 kundër dhe 1 abstenim. Kuvendi gjithashtu miratoi me 84 vota, 3 kundër dhe 3 abstenim, dekretin e Presidentit për shkarkimin e BlediÇÇuççit nga detyra e Ministrit të Brendshëm. Kryeministri Rama vendosi t’ia besoje këtë herë një profili të lartë politik si Balla drejtimin e ministrisë së rëndësishme, pas një serie ngjarjesh të rënda të ndodhura në vend, më e fundit ajo e Thumanës, dhe daljen në skenë të lidhjeve të policisë së Krujës me familjen Rraja e cila dhunoi në mënyrë makabre Jashar dhe Bilbil Majën që guxuan të denonconin në polici dëmet që iu ishin shkaktuar në banesë si pasojë e punieve të gurores së familjes Rraja. Karrierën politike, Taulant Balla e nisi ne vitin 2004, ku shërbeu si këshilltar i kryeministrit të asaj kohe Fatos Nano. Ai u zgjodh për herë të parë deputet i Librazhdit në vitin 2005, në moshën 28 vjeçare dhe prej asaj kohe nuk ka munguar në Kuvendin e Shqipërisë. Pas zgjedhjeve të vitit 2017, Taulant Balla u emërua kryetar i grupit parlamentar socialist. Njëkohësisht, ai u emërua Kryetar i Delegacionit të Parlamentit të Shqipërisë në Parlamentin Europian dhe Zëvendës Kryetar i Këshillit Kombëtar të Integrimit Europian. Pas dorëheqjes së Gramoz Ruçit, Balla u zgjodh Sekretar i Përgjithshëm i Partise Socialiste post të cilin e mbajti deri pas zgjedhjeve të vitit 2021, ku u zëvendësua nga Damian Gjiknuri. Balla është deputet i Qarkut te Elbasanit dhe drejtues politik për Partine Socialiste në Qarkun Fier.