Paralajmërimi i bërë nga kryeministri Albin Kurti për synimet e Serbisë që kërkon të marrë me luftë tri shtete të rajonit, përfshirë Kosovën, ka bërë jehonë në median europiane. Kryeministri i Kosovës ka alarmuar për rrezikun e një lufte që mund ta nisë Serbia në rajon. Gazeta zvicerane NNZ, ka raportuar se në një diskutim të organizuar nga Shoqëria zvicerane për Politikë të Jashtme, Kurti ka thënë se shteti serb nuk ka hequr dorë nga hakmarrja në Kosovë. “Nuk janë tërhequr aspak! Vuçiç thjesht po e mashtron Perëndimin. Elita që e dominon vendin nuk ka hequr dorë kurrë nga projekti i Serbisë së Madhe. Thjesht quhet diçka ndryshe tani, domethënë 'Bota Serbe'. Kjo do të thotë bashkim i të gjithë serbëve në një vend. Kjo do të nënkuptonte shpërbërjen e Bosnjë-Hercegovinës, Malit të Zi dhe Kosovës. Vuçiç ushtron edhe durim strategjik, por synimi mbetet hakmarrja. Ne duhet të jemi të përgatitur për këtë” Kryeministri Kurti e ka përshkruar politikën perëndimore karshi Beogradit zyrtar si naive. Sipas tij, Perëndimi ende e gjykon gabimisht Serbinë. Ai ka folur edhe për zgjedhjen e Donald Trumpit si president i Shteteve të Bashkuara, teksa ka thënë se kjo nuk paraqet rrezik për Kosovën. “Kosova ka punuar mirë me presidentët e të dyja partive. Ajo u çlirua në vitin 1999 nën demokratin Bill Clinton, dhe George Ë. Bush, një republikan, ishte president kur Kosova u bë e pavarur më 2008”. Pas sulmit terrorist të 24 shtatorit të 2023-tës në Banjskë të Zveçanit, i cili është organizuar nga Milan Radoiçiç që është një nga njerëzit më të afërt të presidentit të Serbisë, Aleksandar Vuçiq, liderë të shtetit, por edhe institucione të sigurisë kanë paralajmëruar disa herë se Serbia mund të tentojë sërish ndërhyrjen në Kosovë. Krahas Policisë së Kosovës që është shtuar në numër në Veri, prezencën përreth brezit kufitar e ka rritur edhe KFOR në Kosovë.