Pak para se Serbia të paraqesë shtatë kërkesa ndaj Kosovës, për vazhdim të dialogut, Kryeministri i Kosovës, Albin Kurti ka akuzuar presidentin e Serbisë Aleksandar Vuciq për përgatitje të kërcënimeve ndaj Kosovës. “Vuçiq në koordinim me Rusinë, mbi varrezat masive, po përgatit kërcënime dhe ultimatume të reja ndaj Kosovës”, ka shkruar i pari i qeverisë së Kosovës. Kurti tutje ka shtuar se Serbia në vend të kësaj duhet të kërkojë falje për krimet që ka kryer në Kosovë. “Në vend që Serbia të pendohet për krimet, të kërkojë falje për to dhe të mos i mohojë ato; t’i hapë arkivat e luftës të policisë dhe ushtrisë jugosllave, sidomos të brigadës së motorizuar 37; të paguajë dëmshpërblimet; të bashkëpunojë për të vendosur drejtësi për viktimat e gjenocidit; të angazhohet për pajtim e paqe duke reflektuar mbi përgjegjësinë që ka; ajo ka zgjedhur anën e kundërt, duke përsëritur kërcënimet dhe ultimatumet, ndaj Kosovës dhe qytetarëve të saj, në bashkëpunim dhe koordinim të afërt me Rusinë” Kreu i ekzekutivit të Kosovës shton se “qasja e pushtetit në Serbi ndaj Kosovës është tejet dëshpëruese”. “Fillimisht u normalizua pandëshkueshmëria dhe fushatat propaganduese. E tash po synohen të normalizohen sulmet paramilitare dhe terroriste (Banjska, 24 shtator 2023), kërcënimet dhe ultimatumet, të cilat arsyetohen me lajme të rrejshme dhe fushata dezinformuese, para syve të botës demokratike.” Kryeministri i Kosovës përfundon reagimin e tij duke thënë që “Kosova është më e fortë se kurrë më parë, nuk trembet nga kërcënimet” dhe se mbron të gjithë qytetarët.