Qeveria kosovare reagoi ftohtë ndaj njoftimit të Bashkimit Europian se derisa vendi të ketë një ekzekutiv me mandat të plotë, nuk do të zhvillojnë takime brenda ndërtesës së saj. Në një deklaratë të saj, qeveria e bëri të qartë se Kryeministria është vendi i punës i kryeministrit në detyrë, Albin Kurti. "Kushdo që kërkon takim me kryeministrin në detyrë të Republikës së Kosovës, duhet të vijë në vendin ku punon kryeministri në detyrë i Republikës së Kosovës", tha për REL-në zëdhënësi i Qeverisë në detyrë, Përparim Kryeziu. “Gjithsesi kjo nuk do të thotë që nuk mban takime pune edhe jashtë zyrës së tij, por për këtë duhet të ketë dakordim të palëve. Takime jashtë mjediseve të Kryeministrisë kanë ndodhur edhe në të kaluarën edhe gjatë kohës sa ka qenë me mandat të plotë”, shtoi ai. Ambasadori i BE-së në Kosovë, Aivo Orav, e informoi më herët përmes në letre kryeministrin Kurti se e kishin hedhur këtë hap pas "aktgjykimit të Gjykatës Supreme të Kosovës të 25 qershorit" dhe sqaroi se blloku “ka përshtatur praktikat e tij të angazhimit në përputhje me këtë vendim pas konsultimeve me shtetet anëtare”. Përmes atij aktgjykimi, Supremja shpalli të pavlefshëm një udhëzim administrativ të nënshkruar nga ministri në detyrë i Financave, Hekuran Murati, pasi argumentoi se nxjerrja e akteve nënligjore apo udhëzimeve administrative nga ministrat që janë deputetë është e kundërligjshme dhe shkel dispozitat kushtetuese. Takimi i fundit që Orav zhvilloi me Kurtin në kryeministri ishte më 25 korrik 2025.