Pesë ditë nga sulmi në kanalin e ujit në Zubin-Potok, Albin Kurti dhe Aleksandar Vuçiç do të zbarkojnë të dy në Bruksel dhe do zhvillojnë takime të ndara me shefen e re të diplomacisë së Bashkimit Evropian, Kaja Kallas. Lajmin e konfirmoi zëdhënësja e BE-së për politikën e jashtme, Anita Hipper. Takimet e ndara në Bruksel nuk do të zhvillohen në kuadër të dialogut për normalizimin e raporteve mes Kosovës dhe Serbisë, proces që ndërmjetësohet nga Bashkimi Evropian. Kaja Kallas është shefja e re e politikës së jashtme dhe sigurisë së BE-së dhe së bashku me pjesën tjetër të komisionarëve të KE-së nisën mandatin më 1 dhjetor. Zëdhënësja e saj, Hipper në një konferencë për media më 2 dhjetor u është përgjigjur pyetjeve lidhur me sulmin në kanalin e Ibër-Lepencit më 26 nëntor dhe përsëriti qëndrimin që BE-ja shprehu një ditë pas sulmit në Zubin-Potok, duke e cilësuar sulmin si terrorist. Lidhur me takimet që do të zhvillojë Kallas në Bruksel, Hipper ka sqaruar se ato nuk do të jenë në kuadër të dialogut. Kurti dhe Vuçiç në Bruksel do të zhvillojnë takime të ndara edhe me presidentin e ri të Këshillit Evropian, Antonio Kosta. Më vonë ata do të marrin pjesë në një darkë joformale që Kosta do të organizojë me të gjithë udhëheqësit e rajonit të Ballkanit Perëndimor. Ditëve të fundit, Kurti dhe Vuçiç kanë këmbyer akuza për sulmin në Zubin-Potok. Kosova e fajëson Serbinë për sulmin në kanalin e ujit të Ibër-Lepencit. Serbia mohon se qëndron prapa aktit kriminal dhe ka thënë se ka nisur hetimet e veta për këtë rast. Autoritetet e Kosovës deri më tani kanë arrestuar disa persona të dyshuar për këtë rast dhe kanë sekuestruar armë dhe pajisje të tjera ushtarake gjatë operacioneve në veriun e Kosovës, të banuar me shumicë serbe.