30 mësues do të mund të përfitojnë kredi me 0% interes për blerjen e banesës, nga kuota prej 300 punonjësish në administratën publike të shpallur nga Këshilli i Ministrave si kategori prioritare. Aplikimi për kredinë e lehtësuar do të kryhet në e-albania dhe zgjat deri në 14 gusht, e përfituesit do të përzgjidhen sipas një sistemi pikëzimi brenda 10 ditësh nga afati i mbylljes së aplikimeve. Kushti i parë që duhet të plotësojnë mësuesit në arsimit parauniversitar është të kenë një kontratë pune me afat të pacaktuar. Nga kriteret e aplikimit, më të favorizuar janë punonjësit arsimorë të cilët nuk zotërojnë shtëpi në pronësi. Por mundësi aplikimi ka edhe për mësuesit që rrezikojnë të mbeten të pastrehë pasi banojnë në një shtëpi rrezik shembjeje, apo banesa do ju prishet për shkak të përjashtimit nga procesi i legalizimit si dhe që jetojnë në një objekt të mbipopulluar.