Si pasojë e një zjarri, babai bashkë me dy fëmijët, 9 dhe 12 vjeçar humbën jetën të enjten në Malishevë. Autoritetet konfirmuan që të njëjtët u asfiksuan nga tymi në banesën e tyre në lagjen Mirdita. Familjarët e viktimave treguan se fillimisht nxorën fëmijët nga banesa e i dërguan në Qendrën e Mjekësisë Familjare në Malishevë. Kryefamiljari, 35-vjecar kishte katër fëmijë, dy prej të cilëve në momentin e zjarrit ndodheshin në shkollë, duke i shpëtuar tragjedisë. Ndërkohë, banorët e objektit të banimit kolektiv në Malishevë jashtë kamerave thanë se problematike në vazhdimësi ka qenë instalimi elektrik, gjë që u mohua nga autoritetet lokale. Por, Prokuroria e Policia ende nuk e kanë të qartë se nga nisi zjarri në banesën e familjes pesë anëtaresh, por thonë se ekspertët po kryejnë hetimet e tyre. Për tragjedinë në Malishevë kanë shprehur ngushëllime edhe krerët shtetëror, përfshirë kryeministrin Albin Kurtin e ushtruesen e detyrës së presidentes, Albulena Haxhiun.