Me urdhër të Zyrës së Prokurorit të Specializuar të enjten është ndërmarrë aksion i gjerë në Kosovë, ku janë kryer arrestime e bastisje në disa shtëpi të ish-pjesëtarëve të UÇK-së. Gjatë aksionit janë arrestuar: ish-kryetari i Malishevës, Isni Kilaj, ish-shefi i AKI-së Bashkim Smakaj dhe ish-pjesëtari i UÇK-së, Fadil Faziu. Që në orët e para të mëngjesit të së enjtes e deri në mbrëmje, hetuesit kanë qëndruar edhe në shtëpinë e Hajredin Kuçit në Prishtinë. Ata kanë kërkuar prova në shtëpinë e ish-zv.kryeministrit dhe ish-ministrit të drejtësisë, që mund t’i ndihmojnë në hetimet e tyre lidhur me frikësimin e dëshmitarëve apo zbulimin e informacioneve sekrete të dëshmitarëve të mbrojtur. Edhe PDK-ja ka shprehur shqetësim lidhur me zhvillimet që ndërlidhen me Gjykatën Speciale. Në komunikatën për media kjo parti, që dikur është udhëhequr nga Hashim Thaçi e më pas edhe nga Kadri Veseli, të dy të akuzuar nga Specialja, ka shkruar po ashtu se kërkesa e fundit që e ka paraqitur mbrojtja e katër të akuzuarve në rastin ku po gjykohen ish-udhëheqësit e Shtabit të Përgjithshëm të UÇK-së “ka ngritur shqetësime serioze për trajtimin jo të drejtë” në këtë proces. Mbrojtja e të akuzuarve pak ditë më parë është ankuar për njëanshmëri të trupit gjykues.