Për hetimin lidhur eksportin e mbetjeve toksike nga Shqipërpia në vendet aziatike, Administrata Doganore Shqiptare të mërkurën kishte bërë një sqarim ku thoshte se mbetjet kishin origjinë nga Kosova. Megjithatë, Dogana e Kosovës e mohon një gjë të tillë. Nga ky institucion thonë se meqë nuk kanë qasje në ndonjë raport zyrtar është e vështirë të përcaktojnë saktësinë e rrjedhjes së ngjarjes por konstatojnë që nuka bëhet fjalë për mbeturina të rrezikshme. "- Nuk ka eksport të mbeturinave të rrezikshme që i përgjigjen dërgesave të natyrës së atyre të raportuara në media. - Janë identifikuar eksporte qe referohen në deklaratën për media nga Dogana e Shqipërisë, dhe produkti në fjalë, siç edhe është theksuar nga Dogana e Shqipërisë është koncentrat zinku dhe jo mbetje. Për këtë produkt pronari i subjektit eksportues ka ofruar test raportet nga kompania e mirënjohur e testimeve te industrisë SGS”, Tutje nga ky institucion thuhet se koncentratet e zinkut janë të nxjerra nga miniera e Trepçës dhe janë eksportuar në vazhdimësi. “Koncentratet e zinkut janë eksportuar në vazhdimësi dhe për dallim nga raportimi i mediave shqiptare dhe ndërkombëtare, nuk bëhet fjalë për mbetje (electric arc furnace dust siq i referohet Bloomberg), por për koncentrat zinku të nxjerrë nga Trepça”. Ky institucion thotë se produkti koncentrat zinku i eksportuar ka përbërje të koncentruar të Zinkut (Zn), Hekurit (Fe), Plumbit (Pb) etj, dhe si i tillë nuk klasifikohet si mbetje. Legjislacioni që rrjedhë nga Konventa e Bazelit për Mbetjet e Rrezikshme aplikohet tek mbetjet dhe jo tek lënda e parë që eksportohet. “Eksporte te ngjashme bëhen vazhdimisht nga industria e Republikës së Kosovës dhe nuk ka pasur ndonjëherë pretendime për klasifikim të këtyre produkteve si mbetje të rrezikshme”. Dogana e Kosovës thotë ka hapur një hetim të gjerë mbi këtë çështje dhe do të shqyrtoj në plotni të gjitha çështjet relevante me këto dërgesa. Media ndërkombëtare Bloomberg ka shkruar se mes tjerash bëhet fjalë për transportin e mbi 800 tonëve mbetje toksike nga Porti i Durrësit për në Tajlandë.