Seanca konstituive e kuvendit të Kosovës e 6 gushtit nuk garanton sukses në funksionalizimin e të gjitha institucioneve. Derisa Lëvizja Vetëvendosje si fituese e zgjedhjeve në bashkëpunim me minoritete jo-serbe, mund të konstituojë parlamentin e formojë qeverinë, nuk mund të sigurojë kuorumin prej 80 deputetësh për zgjedhjen e presidentit. Kësisoj, Vetëvendosjes së Albin Kurtit i duhet një partner tjetër që të mos e çojë vendin edhe një herë në zgjedhje. Rikonfirmimi i Lumir Abdixhikut si kryetar i Lidhjes Demokratike të Kosovës, ka rritur mundësitë që të arrihet një koalicion mes këtyre partive, por kur kanë mbetur edhe tre ditë deri në seancën konstituive, asnjë takim nuk është zhvilluar. Të hënën, ministrja në detyrë e tregtisë dhe partnerja e Vetëvendosjes, Mimoza Kusari - Lila tha se mund të jetë çështje orësh kur Kurti fton Abdixhikun për diskutime. Kusari - Lila tha po ashtu se do të ishte problematike të vendoseshin kushte për të arritur një koalicion mes palëve. Një marrëveshje mes Vetëvendosjes, partnerëve të saj dhe Lidhjes Demokratike të Kosovës do të arrihej minimumi i kuorumit të kërkuar me Kushtetutë. Por, kjo nuk është e sigurtë, pasi depoutetë të zgjedhur të LDK-së, janë kundër një bashkëpunimi, edhe pse, të enjten, kur Abdixhiku u rikonfirmua si kryetar, nxorri një deklaratë nga kuvendi që obligon deputetët të jenë një një linjë me vendimet e kryesisë së partisë. Kosova është në javën vendimtare të formimit të institucioneve, në ditën e konstituimit do të nis rrjedhja e afatit 60 ditor për zgjedhjen e presidentit, në rast se deputetët do të dështonin të arrinin këtë, vendi shkon në zgjedhje të jashtëzakonshme.