Komisioni Qendror i Zgjedhje këtë të hënë nuk e ka certifikuar Listën Serbe për të marrë pjesë në zgjedhjet e 9 shkurtit të vitit të ardhshëm. Si shkak për këtë, nga Sami Kurteshi, përfaqësues i Lëvizjes Vetëvendosje në KQZ u morën deklaratat kundër shtetit të Kosovës të bëra nga kryetari i partisë serbe, Zllatan Elek. Zyra për Regjistrimin e Partive Politike ka rekomanduar certifikimin e Listës Serbe dhe kishte konstatuar se i plotëson të gjitha kriteret. Kjo bëri që përfaqësuesit e partive opozitare në Komisionin Qendror të Zgjedhjeve të mos marrin pjesë në votim. Ndërkohë nga Instituti për Demokraci në Kosovë kanë thënë që vendimi i KQZ-së është i motivuar politikisht. “Moscertifikimi i listës Serbe, duket më shumë si vendim i motivuar politikisht sesa i bazuar në kritere ligjore. Ky rast është një ndër disa raste të tilla, kur KQZ-ja ka marrë vendime të ngjashme, por që më vonë janë ndryshuar apo rrëzuar nga PZAP-ja, çka dëshmon mungesën e koherencës dhe profesionalizmit në punën e këtij institucioni”, ka shkruar Ismet Kryeziu, hulumtues i lartë në këtë institucion. Pas mos certifikimit ka reaguar edhe Presidenti i Serbisë, Aleksandar Vuciq i cili ka thënë se Albin Kurti “po përpiqet ta eliminojë kundërshtarin e vetëm politik në Kosovë, që është Lista Serbe”. Në raundin e dytë të certifikimeve, Komisioni Qendror i Zgjedhjeve ka certifikuar 16 subjekte politike me gjithsej 626 kandidatë për deputetë. Paraprakisht, kishte certifikuar 11 subjekte politike me gjithsej 606 kandidatë për deputet për pjesëmarrje në Zgjedhjet për Kuvendin e Republikës së Kosovës, të cilat do të mbahen më 9 shkurt 2025.