Në oazin më të bukur të traditës, në Muzeun Etnografik të Elbasanit u zhvillua një mbrëmje e veçantë artistike e cila ndërthuri muzikën operistike botërore me këngën shqiptare. Programi artistik u soll mjeshtërisht për publikun nga sopranoja Alisa Katroshi dhe pianisti Ardit Serica të cilët rrëmbyen menjëherë vëmendjen e qytetarëve. Koncerti solli një repertor të përzgjedhur me kujdes, duke ndërthurur elegancën e operës me emocionin dhe ngrohtësinë e këngës shqiptare. Aktiviteti synon promovimin e vlerave të artit vokal dhe instrumental, si dhe pasurimin e jetës kulturore të qytetit. Kjo mbrëmje artistike u vlerësua si një tjetër ngjarje e rëndësishme që sjell pranë publikut muzikën cilësore dhe kontribuon në gjallërimin e jetës artistike në Elbasan.