Këshilli i Lartë Gjyqësor dhe ai i Prokurorisë i kërkuan politikës që të respektojnë pavarësinë e prokurorëve dhe gjyqtarëve, nisur nga debatet e fundit pas arrestimit nga SPAK të kryebashkiakut të Tiranës, Erion Veliaj. KLGJ kërkon të mos cenohet pavarësia e gjyqësorit, përmes trysnisë apo presionit të çfarëdo lloji, pasi kjo përbën kërcënim të drejtpërdrejtë ndaj pavarësisë, demokracisë dhe sundimit të ligjit. “Në një shtet të së drejtës, pavarësia e gjyqësorit është një ndër shtyllat themelore për garantimin e drejtësisë dhe mbrojtjen e të drejtave dhe lirive të qytetarëve. Gjyqtarët duhet të jenë të lirë nga çdo lloj forme që ndërhyn në vendimmarrje, në mënyrë që të ushtrojnë detyrën në përputhje me Kushtetutën dhe ligjet në fuqi”. Edhe KLP thekson se institucionet e prokurorisë duhen lejuar të ushtrojnë funksionin në mënyrë të pavarur, të paanshme dhe në përputhje me ligjin. “Këshilli kërkon nga të gjithë aktorët që të respektojnë pavarësinë dhe integritetin profesional të prokurorëve, duke siguruar që ata të ushtrojnë funksionet e tyre pa ndikime të jashtme në funksion të dhënies së drejtësisë”.