Shtetet e Bashkuara kanë konfirmuar heqjen e bllokadës detare ndaj porteve iraniane pak orë pasi hyri në fuqi marrëveshja e re mes Uashingtonit dhe Teheranit. Lajmin e ka bërë të ditur Komanda Qendrore e SHBA-së. Ajo ka thënë se veprimi është bërë në përputhje me udhëzimin e presidentit të Shteteve të Bashkuara të Amerikës, Donald Trump. “Forcat amerikane nuk po pengojnë tranzitin e anijeve për në ose nga portet iraniane në Gjirin Arabik dhe Gjirin e Omanit. Anijet tona të shkëlqyera detare do të mbeten në zonë e përgjithshme për t’u siguruar që të gjitha aspektet e marrëveshjes të respektohen”, ka shkruar Komanda Qendrore. Ndërkaq, sipas burimeve të cituara BBC, udhëheqësi suprem i Iranit, Mojtaba Khamenei, ka deklaruar në një mesazh me shkrim se fillimisht nuk ishte dakord me marrëveshjen, por e ka lejuar vijimin e saj pas garancive të dhëna nga presidenti iranian. Mojtaba Khamenei ka deklaruar gjithashtu se Presidenti i SHBA-së, Donald Trump, ka arritur marrëveshjen “nga dëshpërimi”, duke shkaktuar pakënaqësi në Uashington. Sikur të mos mjaftonte kjo edhe presidenti francez , Emmanuel Macron, deklaroi se nuk "beson" se lufta midis Shteteve të Bashkuara dhe Iranit "ka mbaruar plotësisht", pavarësisht marrëveshjes së nënshkruar. "Është gjithmonë më mirë të kesh një marrëveshje sesa luftë, veçanërisht kur ekziston rreziku i përshkallëzimit", shtoi presidenti francez. Marrëveshja e përbërë nga 14 pika përfshin, ndër të tjera, rihapjen e Ngushticës së Hormuzit dhe një plan prej 300 miliardë dollarësh për rindërtimin e Iranit, si pjesë e një pakete më të gjerë stabilizimi dhe bashkëpunimi ekonomik.