Në kohën kur në territoret palestineze konflikti eshte përflakur sërish, Turqia testoi me sukses një tjetër armë të prodhuar brenda kufijve, sistemin anti-ajro Hisar-A. Sistemi në fjalë konsiderohet tejet efikas kundër avionëve, helikopterëve, raketave cruise, avionëve pa pilotë e raketave ajër-tokë. Kjo është arma më e fundit që i shtohet arsenalit në rritje në Turqisë. Presidenti turk Rexhep Tajip Erdogan e ka ngritur zërin kundër sulmeve izraelite në rajonet palestineze, e dy ditë më parë deklaroi se Ankaraja nuk do ta pranojë persekutimin e shtetit hebre, edhe nëse bota e injoron atë. “ Ata që zgjedhin të heshtin përballë gjakderdhjes izraelite apo e mbështesin atë për arsye politike dhe ideologjike, duhet ta kenë të qartë se një ditë, do të jetë radha e tyre”, u shpreh Erdogan, i cili bëri thirrje që Këshilli i Sigurimit të kalojë në veprim për të garantuar paqen, duke shtuar se Turqia është e gatshme të mbështesë aksionin e OKB-së. Presidenti turk i tha më herët homologut të tij rus se Izraelit “ i duhet dhënë një mësim i mirë”. Ai i ka sugjeruar shefit të Kremlinit të marrë në konsideratë idenë e krijimit të një force ndërkombëtare mbrojtëse, e cila të shërbejë si “mburojë” për palestinezët. Turqia, e cila në 1949-tën u bë vendi i parë me shumicë myslimane që njohu Izraelin, i ndërpreu marrëdhëniet me të ne 2010-tën pas vrasjes së 10 aktivistëve turq pro-palestinës, të cilët ishin në bordin e një anijeje turke dhe po dërgonin ndihma në Gaza, ku shteti hebre kishte vendosur prej kohësh një bllokadë detare.