Sekretari amerikan i Shtetit, Marco Rubio, ka deklaruar se një marrëveshje për t’i dhënë fund konfliktit me Iranin mund të finalizohet që “sot”, duke sinjalizuar përparim të shpejtë në negociatat e ndërmjetësuara mes palëve. Por në Teheran, entuziazmi i Uashingtonit është pritur me rezerva. Kryetari i Parlamentit iranian ka hedhur poshtë pretendimet për një marrëveshje të afërt, duke theksuar se, ndonëse ka pasur përparim në bisedime, “është e pavërtetë të thuhet se një marrëveshje është pranë finalizimit”. Ndërkohë, sipas burimeve të cituara nga Al-Arabiya, Irani thuhet se është i gatshëm të largojë nga territori i tij uraniumin e pasuruar në nivele të larta, duke kërkuar që ai të transferohet në Kinë. Po sipas këtyre raportimeve, Teherani po kërkon garanci nga Pekini përpara se të ecë përpara me çdo marrëveshje të mundshme me Shtetet e Bashkuara.