Mbetje kockore që dyshohet se u përkasin të paktën 23 personave janë gjetur në territorin e komunës së Zubin Potokut, në veri të Kosovës. Prokuroria Speciale njoftoi se mbetjet janë zbutuar në disa zona ku dyshohet për ekzistencën e varreve masive. Sipas autoriteteve, bëhet fjalë për vlerësime paraprake dhe ende nuk mund të konfirmohet identiteti i viktimave. Identifikimi përfundimtar pritet të kryehet pas përfundimit të ekzaminimeve mjeko-ligjore dhe procedurave të tjera të nevojshme. Për këtë rast, Prokuroria Speciale dhe Policia e Kosovës kanë nisur hetimet ndaj tre personave, të identifikuar me inicialet J.R., M.J. dhe M.B., të cilët dyshohen për veprën penale “Krime lufte kundër popullsisë civile”. Të tre ndodhen në paraburgim. Sipas autoriteteve kosovare, njëri prej të dyshuarve dyshohet se gjatë luftës së Kosovës kishte qenë pjesë aktive e Ushtrisë Jugosllave. Gërmimet në këtë zonë kanë nisur pas verifikimit të informacioneve për varre të mundshme masive dhe janë zhvilluar në disa pika, përfshirë Kalludrën e Vogël dhe Jabukën. Autoritetet paralajmërojnë se kërkimet do të vazhdojnë edhe gjatë javëve apo muajve të ardhshëm, pasi mbetjet e gjetura janë të shpërndara në terren. Rasti lidhet me një prej episodeve më të dhimbshme të luftës së Kosovës. Bëhet fjalë për 23 shqiptarë të zhdukur që nga prilli i vitit 1999, të njohur si “grupi i intelektualëve të Mitrovicës”. Në mesin e tyre kishte mjekë, profesorë, avokatë dhe profesionistë të tjerë. Informacioni për një varr të mundshëm masiv në këtë zonë ishte bërë publik për herë të parë më shumë se një dekadë më parë. Sipas Fondit për të Drejtën Humanitare të Kosovës dhe atij të Serbisë, verifikimi i këtij informacioni ka zgjatur më shumë se 20 vjet. Autoritetet kosovare kanë akuzuar Serbinë për mungesë bashkëpunimi në zbardhjen e fatit të personave të zhdukur dhe kanë kërkuar hapjen e arkivave të institucioneve që kanë vepruar gjatë luftës.