Viktimë e urisë në Gaza ka mbetur dhe akademiku palestinez, shkrimtari dhe poeti Omar Harb: Mediat lokale thonë se lektori universitar ndërroi jetë nga kequshqyerja si pasojë e bllokadës disa mujore izraelite që ka gjunjëzuar enklavën. Shëndeti i tij kishte ardhur në përkeqësim javët e fundit, e në një intervistë të dhënë këto kohë për Al Jazeerën, Harb që përpara fillimit të konfliktit tetorin e vitit 2023 peshonte 120 kilogramë, tani kishte një peshë prej më pak se 40 kilogramësh. Në intervistën e dhënë tre javë para vdekjes, akademiku kishte përshkruar vuajtjet e tij personale duke u lutur për ushqim, ilaçe dhe ndihmë mjekësore që kurrë nuk i mori. Ai gjithashtu kishte kërkuar një karrocë të re për personat me aftësi të kufizuara. “Kam parë fotografitë e mia para dhe pas luftës dhe mendova, si është e mundur që të arrijë njeriu kështu. Nuk e di pse jemi në këtë pikë. Njerëzit po vuajnë, dhe askush nuk i kushton vëmendje kësaj vuajtjeje”, qe shprehur ai. Tragjedia që e pllakosi shkrimtarin palestinez ishte e madhe: Gjatë luftës, ai humbi të paktën 26 anëtarë të familjes, përfshirë bashkëshorten, fëmijët dhe nipërit e mbesat. Numri i përgjithshëm i vdekjeve të lidhura me urinë në Gaza është rritur në 370, ndërsa shumicën e viktimave i përbëjnë fëmijët, gratë dhe të moshuarit. Edhe pse Harbit iu tha se do të evakuohej nga Gaza gjatë Ramazanit vitin e kaluar, ai mori më pas një njoftim se nuk e kishte emrin në listë.