Thirrja për ndihmë drejtpërdrejt në Top Channel nga një gomone në det më 9 janar të vitit 2004, kthen në kujtesë një prej dramave më të mëdha të Shqipërisë së pas viteve '90. Në 35-vjetorin e eksodit shqiptar, historia u kthye buzë detit, te "Rrënjët" në Durrës, ku vepra "Hartë memece për të mbyturit" e autorit Arian Leka u shndërrua në një shfaqje artistike dokumentare, nën regjinë e Driada Dervishit. Një thirrje për të mos harruar jetët e humbura, fatet që mbetën pa përgjigje dhe plagën e mijëra shqiptarëve që u nisën natën me gomone drejt Italisë, në kërkim të një jete më të mirë. Përmes poezisë, rrëfimit, raportimit dhe interpretimit skenik, vepra ngre pyetje që mbeten ende pa përgjigje: "Pse ikëm atëherë dhe pse vazhdojmë të ikim?" Për herë të parë, kjo dramë detare shqiptare bëri bashkë aktorë profesionistë, anëtarë të Klubit të Librit, gazetarë dhe grupmosha të ndryshme.