As takimi i 17 shtatorit në Bruksel nuk prodhoi rezultate për procesin e dialogut mes Kosovës dhe Serbisë. Përpos që u diskutua për çështjen e hapjes së Urës së Ibrit, u paraqitën kushte të tjera për të jetësuar këtë qëllim të Qeverisë së Kosovës. Kryenegociatori i Serbisë ka kërkuar zgjerimin e territorit të Mitrovicës së Veriut. “Ne kërkojmë respektimin e marrëveshjes, ku insistojmë demarkimin në zonën e Suhodollit si parakusht për hapjen e urës”, tha Petar Petkoviq nga Brukseli. Çështja e demarkimit të kufijve kadastral është pjesë e marrëveshjeve për rivitalizimin e Urës së Ibrit në vitet 2015 dhe 2016. Megjithatë, rikthimi i saj në diskutim në këtë kohë, sipas njohësve është rezultat i politikës shkurtpamëse të Qeverisë së udhëhequr nga Albin Kurti. Njohësit shtojnë se tashmë dialogut do të zhvillohet vetëm në nivel teknik e nuk do të prodhojë rezultate, pasi do të diskutohet vetëm për hapjen e Urës së Ibrit. Ndërkohë, në dakordimin e vitit 2015, për rivitalizimin e urës së Mitrovicës thuhet ndër të tjera se “deri më 10 tetor 2015, hartat e kufijve administrativë të zonave kadastrale në zonën e Suhadollit dhe Kroit të Vitakut do të zgjidhen përmes Memorandumit të Mirëkuptimit për Planet Zhvillimore Komunale, Hartës Zonale Komunale dhe Planit Rregullues të Detajuar ndërmjet ministrive përkatëse dhe dy komunave”. Në 2016 në Planin e Bashkimit Evropian për zbatimin e Marrëveshjes për Urën e Mitrovicës, thuhet se zgjidhja e kontekstit administrativ të komunave duhet të arrihej brenda tetorit të atij viti. Sipas Ligjit për Kufijtë Administrativ të Komunave, “kufiri në mes Komunës së Mitrovicës së Veriut dhe Komunës Mitrovica e Jugut do të jetë vija e përcaktuar që do të kaloj nëpër zonën kadastrale të Suhodollit”. Sipas po të njëjtit ligj, fshati Suhodoll është në administrim të Komunës së Mitrovicës së Jugut.