Qeveria e Kosovës ka vazhduar me zbatimin e planit për hapjen e Urës së Ibrit. Këtë të enjte Ministria e Infrastrukturës ka vazhduar me testimin final të stabilitetit të Urës mbi Lumin Ibër. Sic ka njoftuar zëvendës ministri i Infrastrukturës, këto janë testet finale që po i bën kompania e kontraktuar përmes kamionëve me ngarkesë për të testuar stabilitetin e Urës së Ibrit. Sic tha ai, brenda dy - tre ditësh do të hartohet raporti final sa i përket stabilitetit të Urës së Ibrit. Durmishi ka shtuar se testimet po bëhen në bashkëpunim me partnerët ndërkombëtarë. Bashkëpunimi është shumë i mirë, nuk na kanë dhënë kohë, sepse kjo është kontratë e nënshkruar dhe po vazhdon implementimi i saj dhe raporti final do të na tregojë nëse ura është stabile apo ajo. Megjithatë, kjo del të mos jetë e saktë, pasi nga Bashkimi Evropian të enjten paralajmëruan masa shtesë ndaj Kosovës për shkak të veprimeve të fundit të institucioneve. "Pra, ne kemi masa të vendosura, dhe këto masa mund të shtohen gjithashtu nëse, të gjithë aktorët e Bashkimit Evropian bien dakord se ato duhet të shtohen. Në pjesët e tjera të pyetjes suaj, ditët e fundit kemi dhënë deklaratat tona dhe qëndrimet për çështjet e ndërhyrjes në zyrat e postës së Serbisë dhe për përpjekjet për hapjen e njëanshme të urës mbi Ibër, ua kemi bërë shumë të qartë qëndrimin tonë homologëve tanë në Kosovë në shumë nivele, në shumë mënyra dhe përmes shumë partnerëve. Nuk është vetëm Bashkimi Evropian. Në thelb, të gjithë partnerët ndërkombëtarë të Kosovës po i thonë administratës në Prishtinë që të mos përfshihet në këtë varg hapash kundërproduktive, negative, të njëanshme, të pabashkërenduara" Aksioni i Policisë së Kosovës për mbylljen e degëve ilegale të Postës së Serbisë është kritikuar edhe nga Shtetet e Bashkuara të Amerikës dhe KFOR-i, të cilët kanë dalë edhe kundër hapjes së Urës së Ibrit. Bashkësia ndërkombëtare pret që Qeveria e Kosovës të dëgjojë mesazhet e tyre.