Azilkërkuesit në Gjermani ankohen se telefonat e tyre celularë janë kontrolluar në kohën e procedurës për azil, cka u shpall e paligjshme nga një gjykatë vendase e mund të mos mbetet me kaq. Kërkimet dhe kontrollimet e tilla të celularëve janë bërë një praktikë e zakonshme në procedurat e azilit në Gjermani. Sipas gjykatësve të paktën në disa raste, të tilla verifikime kanë qenë të paligjshme. Gjykata Administrative e Berlinit vendosi së fundi se se Zyra Federale për Migracionin dhe Refugjatët (BAMF) nuk kishte të drejtë të kërkonte qasje në të dhënat e telefonit celular në këtë fazë të aplikimit. Në të njëjtën kohë, BAMF shkeli ligjin duke ruajtur informacione të panevojshme. Që nga viti 2017, autoritetet gjermane janë lejuar të vlerësojnë të dhënat e telefonit celular të refugjatëve, në rastet kur ata nuk mund të konfirmojnë identitetin e tyre me një pasaportë të vlefshme ose me një kartë identiteti. Por azilkërkuesit kanë paditur autoritetet në tre raste të ndara. Kontrollet, sipas tyre, janë joefektive dhe të dyshimta për sa i përket ligjit për mbrojtjen e të dhënave. DW thotw se ky mund të jetë një shembull për procedura të tjera. Gjykimi mund të ketë pasoja jodirekte edhe në ankesat e vazhdueshme tek Autoriteti Mbikëqyrës i Mbrojtjes së të Dhënave.