Një grup artizanesh nga Korça dekoruan pemët e Zonës Këmbësore me qëllim që jo vetëm të rizgjojnë dëshirën tek brezat më të rinj për ti ruajtur këto tradita por edhe ti promovojnë ato. Punimet e dorës të realizuara nga gratë dhe vajzat korçarë të cilat për vite me radhë kanë shërbyer si një element dekorues për çdo shtëpi, kanë zbukuruar pemët në qendër të qytetit me motive dhe ngjyra nga më të ndryshmet. Një grup artizanesh korçarë së bashku me disa vajza të mbledhura në oborret e shtëpive punuan me grep për të realizuar veshjet për trungjet e gati 60 pemëve duke sjellë një dekor zbukurues për një prej zonave më të frekuentuara të qytetit. Më të moshuarat tregojnë se tradita duhet përcjellë nga njëri brez tek tjetri ndërsa më të rejat duken entuziaste që po përvetësojnë këtë pjesë të artizanatit.