Bashkimi Europian ngriti shqetësime për përdorimin e topave të zërit apo topave shurdhues nga ana e Greqisë, me qëllimin të trembë emigrantët e t`i mbajë larg kufirit të saj me Turqinë. Pajisja akustike ka madhësinë e një televizori të vogël, por zhurmën e bën si të një motorri avioni. Ajo është pjesë e një grupi barrierash të reja dixhitale dhe eksperimentale të cilat po instalohen dhe testohen në kufirin Grek me Turqi për 200 kilometra me qëllimin t`i ndalojnë njerëzit të hyjnë ilegalisht në BE. Por zëdhënësi i Komisionit Europian Adalbert Jahnz, u shpreh se ekzekutivi i BE-së i sheh me shqetësim raportet në media lidhur me këtë sistem dhe do të kërkojë informacion nga Athina mbi përdorimin e tij. Jahnz tha se ndërsa vendet anëtare të BE të tilla si Greqia vërtet janë të autorizuara të vendosin se si i menaxhojnë kufijtë e tyre, metodat që përdorin "duhet të jenë në përputhje me të drejtat themelore europiane, përfshirë të drejtën e dinjitetit". "Masat duhet të jenë proporcionale dhe të respektojnë të drejtat bazë, duke përfshirë ato të azilit dhe të mos kthimit" u shpreh ai, duke iu referuar politikës së dërgimit të njerëzve mbrapsht pasi e kanë kaluar kufirin dhe pa i dhënë shansin për të kërkuar azil.