Gjykata Speciale në Hagë ka ngritur akuzë të re ndaj ish-presidentit të Kosovës, Hashim Thaçi. Tani ai akuzohet edhe për vepra penale që lidhen me pengim të drejtësisë. Për të njëjtat vepra, siç ka njoftuar Specialja të premten, janë arrestuar edhe Bashkim Smakaj, Isni Kilaj e Fadil Fazliu. Ndërsa për Hajredin Kuçin është lëshuar fletëthirrje për paraqitje. Siç bëhet e ditur në njoftim, ndaj Thaçit janë ngritur tre akuza për pengim të personave zyrtarë në kryerjen e detyrave zyrtare, tre akuza për shkelje të fshehtësisë së procedurës dhe katër akuza për mosbindje ndaj gjykatës. Ndërsa ka njoftuar për arrestimin e Smakajt, Kilajt dhe Fazliut, Specialja ka bërë të ditur se ata janë transferuar në qendrën e paraburgimit në Hagë dhe se paraqitjen e parë para gjykatës do ta kenë të dielën më 8 dhjetor. Sipas aktakuzës, në periudhën midis 12 prillit 2023 dhe 2 nëntorit 2023, gjatë vizitave në objektin e paraburgimit, Thaçi dyshohet se u ka dhënë Smakajt, Kilajt, Fazliut e Kuçit “informacion konfidencial në lidhje me dëshmitarë të rëndësishëm dhe i ka udhëzuar për të ndikuar në dëshmitë e këtyre dëshmitarëve”. Thaçi, bashkë me Jakup Krasniqin, Kadri Veselin dhe Rexhep Selimin, tashmë gjenden në paraburgim që nga fundi i vitit 2020. Ata akuzohen për krime kundër njerëzimit dhe për krime lufte.