Qindra kriminelë të dyshuar janë arrestuar në vende të ndryshme të botës gjatë operacionit të njohur si ‘Mburoja Trojane’, në të cilin bandat josheshin të përdornin një aplikacion “të sigurtë” të komunikimeve të inkriptuara, por në fakt të menaxhuara nga FBI amerikane,. FBI në bashkëpunim me policinë e Australisë ishin duke operuar fshehtësisht aplikacionin e komunikimeve të inkriptuara ANOM, i cili ishte bërë i preferuar nga bandat kriminale prej “fshehtësisë” së komunikimeve që ofronte. Rrjedhimisht operacioni i fshehtë u kthye në një përpjekje të përbashkët anti-kriminale në 16 vende të botës, njoftonte sot Europol me goditje të rënda kundër krimit të organizuar. Operacionet sollën arrestimin e më shumë se 800 të dyshuarve, kapjen e 250 armëve të zjarrit dhe 55 makinave luksoze. U konfiskuan gjithashtu disa ton droga si kokainë, kanabis e MDMA, si dhe një vlerë prej $48 milionë në valuta të ndryshme dhe kriptovalulta. Zv. drejtori i Europol, Jean-Philippe Lecouffe tha se operacioni solli rezultate “globale të jashtëzakonshme”.