Organizata Botërore e Shëndetësisë u shpreh thellësisht e “shqetësuar" nga rritja e shpejtë e infektimeve me koronavirus ne Europë. Në një pohim për BBC-në, drejtori rajonal i OBSH-së, Hans Kluge paralajmëroi se rreth 500,000 vdekje mund të regjistrohen deri në muajin mars, nëse nuk ndërmerren veprime urgjente. Paralajmërimi i tij pasoi njoftimet e Çekisë dhe Sllovakisë për numër rekord të rasteve të reja me COVID-19. Edhe vende tjera europiane raportojnë një përkeqësim të ndjeshem të situatës me pandeminë. Kluge thotë se në këtë gjendje kanë ndikuar një sërë faktorësh, duke përfshirë vaksinimin e pamjaftueshëm, sezonin e dimrit si edhe dominimin rajonal të variantit tejet të transmetueshëm Delta. Austria njoftoi më herët vendosjen e një karantine kombëtare duke nisur nga 22 nëntori, ndërsa vende si Republika Çeke dhe Sllovakia kanë urdhëruar kufizime të reja ndaj njerëzve që nuk janë të vaksinuar. Javën e kaluar Holanda vendosi një bllokim të pjesshëm tre-javor për të parandaluar përhapjen e COVID-19 pasi gjatë periudhës së fundit është shënuar rritje e rasteve të reja me koronavirus.