Në fshatin Grevë të Peshkopisë, një nga zonat më të njohura për kultivimin e qershive dhe mollëve, fermerët po përballen me një sezon të mbarë prodhimi, por edhe me mungesë të theksuar të fuqisë punëtore. Banorët dalin çdo ditë buzë rrugës për të shitur qershitë e sapovjela, ndërsa tregojnë vështirësitë e punës në bujqësi, kostot e larta dhe mungesën e mbështetjes. Disa fermerë paguajnë deri në 35 mijë lekë të vjetra në ditë për punëtorët, ndërsa të tjerë thonë me humor se vitin e ardhshëm do të sjellin punëtorë nga Gjermania dhe Austria, duke ofruar deri në 100 euro në ditë.