Dështimi i takimit të radhës Kurti-Vucic në Bruksel, të cilin BE-ja u angazhua fort ta organizonte me pritshmëri të ripërtërira se më në fund do të shihej dritë në fundin e tunelit të errët të dialogut të zvarritur prej një dekade tashmë, solli nga njëra anë zhgënjim në radhët e ndërkombëtarëve, dhe nga ana tjetër paralajmërime të zymta për atë që u pa fajtorja kryesore e kësaj situate: Kosovën. Deklaratat e zyrtarëve të BE-së të përfshirë në procesin e shumëtrumpetuar nga Perëndimi, që po kthehet në një shuplakë në fytyrën e tij me mungesën therëse të rezultateve të konkretizuara në terren, shënjestruan Albin Kurtin si shkaktarin kryesor të ngecjes së radhës së një mekanizmi që gjithmonë e më shumë, po duket se nuk funksionon.