“Nuk kemi ndërmend t`i hyjmë një gare armatimesh me Turqinë”, deklaroi kryeministri grek Kyriakos Mitsotaqis gjatë vizitës zyrtare dy ditore në Paris, por duket sikur fjalët e tij nënkuptonin saktësisht të kundërtën. Këto komente, kreu i ekzekutivit grek i bëri në kohën kur Athina vuloste me Parisin zyrtar një marrëveshje 3 miliarde dollarëshe për blerjen e tre fregatave të reja franceze të pajisura me teknologjinë më të fundit, bisedimeve për një të katërt, tre korveta e 6 Raphale që e cojnë në 24 flotën e avionëve luftarakë të blerë prej Francës nga vendi ynë fqinj. Vetë Mitsotakis u shfaq i qeshur në foto me shefin e Elizesë Emmanuel Macron pas marrëveshjes që Athinës i jepte përvec armatimeve, edhe garancinë e mbështetjes franceze në rast konflikti, ndërs për Francën ishte një melhem mbi plagën e porsahapur nga pakti AUKUS, që i hoqi nga duart ujdinë tejet të leverdisshme miliarda dollarëshe të nëndetesëve të saj konvencionale me Australinë. Në kushte të tilla, është e kuptueshme që komentet e kryeministrit grek iu dukën si “hi syve” Rexhep Tajip Erdoganit. Por edhe ky i fundit nuk ka qëndruar duarkryq e po farkëton aleancat e tij. Si rreshtohen tani palët dhe si ndryshon balanca e fuqisë në Mesdhe?