Zonja e parë e Turqisë Emine Erdogan i ka shkruar një letër gruas së Presidentit të SHBA-së Donald Trump, Melania Trump, dhe i ka kërkuar asaj të kontaktojë kryeministrin e Izraelit dhe të ngrejë çështjen e fëmijëve në Gaza, thanë autoritetet në Ankara të shtunën. Emine Erdogan shkroi se ishte frymëzuar nga letra që Melania Trump i dërgoi Presidentit rus Vladimir Putin në fillim të këtij muaji në lidhje me fëmijët Ukrainas të rrëmbyer nga Rusia. "Kam besim se ndjeshmëria e rëndësishme që keni treguar për fëmijët ukrainas... do të shtrihet edhe në Gaza," shkroi Emine Erdogan në letrën që u botua nga presidenca turke. "Këto ditë, kur bota po përjeton një zgjim kolektiv dhe njohja e Palestinës është bërë një vullnet global, besoj se thirrja juaj në emër të Gazës do të përmbushte një përgjegjësi historike ndaj popullit palestinez," shtohej në letër. Një monitorues global i urisë përcaktoi të premten se Qyteti i Gazës dhe zonat përreth po vuajnë zyrtarisht nga uria, dhe ka të ngjarë që ajo të përhapet, duke përshkallëzuar presionin mbi Izraelin për të lejuar më shumë ndihma në territorin palestinez. Kryeministri izraelit Benjamin Netanyahu e hodhi poshtë këtë raport duke e quajtur një "gënjeshtër të madhe" dhe tha se Izraeli kishte një politikë për të parandaluar, jo për të shkaktuar urinë.