Greqia po vazhdon luftën me zjarret, që sa vijnë e intensifikohen, dhe që kanë marrë tashmë dy jetë njerëzish e kanë detyruar shumë të tjerë të evakuohen. Kjo është vala e dytë vdekjeprurëse e zjarreve masive brenda vetëm një muaji. Zjarret vazhduan të digjen në mënyrë të pakontrollueshme në pjesën verilindore të Greqisë, ishujt Evia dhe Kythnos, si dhe rajonin e Beoetia në veri të Athinës. Zjarret janë përhapur në mënyrë të shpejtë për shkak të erërave të forta dhe temperaturave deri në 41 gradë Celsius. “Ka nëntë fronte aktive... situata është e ngjashme me atë gjatë korrikut”, tha një zëdhënëse e departamentit të zjarrfikësve për agjencinë e lajmeve AFP, duke iu referuar zjarreve që lanë pesë persona të vdekur gjatë korrikut. Në orët e vona të mbrëmjes së të hënës u vendos që banorët e zonave të rrezikuara të evakuoheshin në Alexandroupolis, një qytet në verilindje të Greqisë ku zjarret po vazhdojnë për të katërtën ditë radhazi.