Në disa prej komunave në veri të Kosovës janë shfaqur disa grafite proruse ku dominon shkronja ‘Z’, e cila është shndërruar në simbolin e mbështetjes së pushtimit rus të ukrainës. Sipas KosovaPress këto grafite janë bërë nga aktivistë të Listës “Srpska”. Mjafton këtu të kujtohet, se tani kur sulmi rus në Ukrainë ka hyrë në ditën e 17 të tij, Serbia është ndër të vetmet vende që nuk e ka dënuar pushtimin dhe as nuk ka mbështetur sanksionet që BE dhe perëndimi ka vendosur mbi Moskën. Përkundrazi madje, në rrugët e Beogradit, u panë marshime në mbështetje të rusisë dhe pushtimit të Ukrainës, me flamujt rus që u valëvitën në kryeqytetin serb. E të tilla manifestime janë shtuar, vecanërisht tani para zgjedhjeve parlamentare dhe presidenciale që do të mbahen në serbi më 3 prill. Serbia tradicionalisht ka patur lidhje të ngushta me Moskën, aq sa Rusia është konsideruar prej saj si Vëllai i madh.