Ushtruesja e detyrës së presidentit të Kosovës, Vjosa Osmani u shpreh se e drejta e votës është e drejtë e patjetërsueshme dhe “nuk mund të kushtëzohet me një telefonatë”. Reagimi I saj erdhi pasi Komisioni Qendror i Zgjedhjeve nxori një vendim për verifikimin e aplikimeve për regjistrimin e votuesve jashtë Kosovës. Në bazë të këtij vendimi, KQZ-ja do t’i refuzojë aplikimet atyre që nuk pergjigjennë telefon në kohën kur KQZ-ja i thërret për verifikim. “E drejta e votës është e drejtë themelore, e garantuar me Kushtetutën tonë dhe me të gjitha konventat ndërkombëtare për të drejtat e njeriut. Ky vendim i KQZ-së, e specifikisht pika IV e tij, mund të krijojë rrethana me të cilat e drejta e votës shkelet në mënyrë flagrante”, tha Osmani. Pika IV e vendimit të KQZ-së thotë se “nëse aplikuesi nuk lajmërohet në telefon, atëherë aplikacioni i tij do të refuzohet”. Kosova do të mbajë zgjedhjet e parakohshme parlamentare në 14 shkurt. KQZ-ja po ashtu mori vendim që periudha për regjistrimin e votuesve jashtë Kosovës të fillojë më 13 janar dhe të përfundojë në 21 janar.