“Vila e kryeterroristit të Banjskës, Milan Radoiçiq, vëzhgohet 24 orë nga kamerat e sigurisë”, ka bërë me dije Policia e Kosovës, pas deklaratave dhe dyshimeve se aty ka pasur aktivitet të kundërligjshëm. Përmes një reagimi, Policia thotë se që nga koha e marrjes së objektit në mbikëqyrje për siguri, atje janë vendosur njësitë policore të profileve të ndryshme, të cilat kujdesen për sigurinë e objektit dhe hapësirës përreth. Policia e Kosovës, bën me dije se çdo lëvizje apo hyrje-dalje në këtë objekt, monitorohet nga policia dhe se hyrja-dalja, bëhet vetëm nga personat e autorizuar që u lejohet qasja, siç janë zyrtarët policorë, zyrtarët e mbrojtjes së afërt, zyrtarët institucional dhe vetëm personat që marrin leje të caktuar dhe në asnjë rast nuk lejohen përsona të tjerë apo civil. Sipas policisë, se në këtë objekt nuk është zhvilluar asnjë aktivitet i kundërligjshëm apo çështje që pretendohet apo deklarohet nga individ të caktuar në media.