Kryeministri i Kosovës Albin Kurti, ka deklaruar shkurtimisht për gazetarët këtë të hënë, se ai do të udhëheqë sërish me ekzekutivin e ri të dalë nga zgjedhjet parlamentare të 9 shkurtit. “Së pari rezultatet përfundimtare, pastaj certifikimi, pastaj bisedimet. Qeveria, e sigurt, e udhëhequr nga Lëvizja Vetëvendosje dhe unë”, tha Kurti. Kreu i qeverisë së Kosovës, nuk iu përgjigj pyetjeve të gazetarëve se me cilat parti opozitare partia e tij, Lëvizja Vetëvendosje, është më e përafërt. Sakaq, numri dy i LVV, Glauk Konjufca, në një deklaratë për një media italiane u shpreh se synimi është formimi I qeverisë të jetë me partitë joserbe. Partitë joserbe kanë të rezervuara 10 ulëse në Kuvendin e Kosovës, aq sa kanë edhe partitë serbe. Konjufca, i cili mori mbi 200 mijë vota në këto zgjedhje, u shpreh se bashkëpunimi me partitë opozitare nuk ka gjasa. Edhe partitë e mëdha, Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës janë shprehur kundër bashkëpunimit me LVV-në e Kurtit.