Pacienti me covid 19 i shtruar në spitalin infektiv të Tiranës, i cili një ditë më parë u hodh nga kati i tretë ka gjetur vdekjen. Pavarësisht përpjekjes së mjekëve për ta mbajtur në jetë, 69-vjecari Reshat Grembi nuk ka mundur të mbijetojë. I moshuari kishte disa ditë i shtruar në pavion dhe mesditën e së martës është hedhur nga kati i tretë, ndërkohë që mjekët u vunë në alarm. Në momentin e parë ai ka mbetur i plagosur, por mëngjesin e kësaj të hëne u konfirmua se ai ka gjetur vdekjen. Sipas burimeve spitalore, pacienti ndodhej në terapi intensive, ndërsa pas hedhjes pësoi dëmtime të mëdha në kokë që i morën dhe jetën. Rasti i parë i vetëvrasjeve është regjistruar më 13 gusht, ku 29-vjeçari Xhino Koça nga Durrësi u hodh nga kati i tretë i “Shefqet Ndroqit” në gjendje të rënduar psikologjike, ku për pasojë ndërroi jetë. Ndërkohë, që në 2 shtator Hasan Mira, 65 vjeç, i dha fund jetës duke u hedhur nga kati i katërt i COVID 2 vetëm dy ditë pasi ishte shtruar aty. Ndërkohë rasti i tretë ishte ai i Preng Gjonajt, 52 vjeç, me origjinë nga Tropoja e me banim në Tiranë, u regjistrua në 1 nëntor sërish tek Sanatoriumi.