Astronautja e NASA-s Jessica Meir, e vendosur në Stacionin Ndërkombëtar Hapësinor, ndau një video të aurorave, që duket sikur po vallëzonin. Videoja u regjistrua nga anija kozmike SpaceX Dragon, në ISS, dhe fiksonte dritat e jugut, Aurora Australis mbi qiellin e Antarktidës. Duke ndarë klipin spektakolar në mediat sociale, Meir tha: "Ndryshe nga aurorat e mëparshme që kam parë, kjo vallëzon dhe gjarpëron direkt poshtë nesh, duke dhënë një shfaqje mahnitëse. Jam e mrekulluar nga ky fenomen". Aurorat ndodhin kur grimcat e ngarkuara nga Dielli, të mbartura nga erërat diellore, përplasen me gazrat në atmosferën e sipërme të Tokës. Fusha magnetike e Tokës i drejton këto grimca drejt poleve, ku ato përplasen me oksigjenin dhe azotin, duke krijuar shirita drite shumëngjyrëshe dhe lëvizëse. Aurora Australis ose Dritat Jugore ndodhin po aq shpesh sa Aurora Borealis, Dritat Veriore, por për shkak se shfaqen kryesisht mbi Antarktidë, ku jetojnë pak njerëz, vërehen ose fotografohen rrallë nga Toka. Në një postim tjetër, Meir ndau disa fotografi të dritave, me sa duket të marra nga Stacioni Ndërkombëtar Hapësinor, dhe tha: "Po ndodhin shumë gjëra tani në Stacionin Ndërkombëtar Hapësinor, por për fat të mirë, të gjithë jemi të sigurt." Besohet se astronautja po flet për shqetësimet e fundit për një rrjedhje në stacion, që i shtyu shkurtimisht astronautët të ngjiteshin në bordin e anijes hapësinore të ankoruar në stacion, që do të përdorej si varkë shpëtimi në rast rreziku. Por rrjedhja në modulin rus Zvezda të stacionit, u rregullua dhe alarmi u tërhoq nga NASA.