Për dy ditë në të gjithë vendin po marrin dozat e vaksinave për qytetarët mbi 18 vjeç që duan të vaksinohen. Kryeministri i vendit, Edi Rama, përmes një postimi në ‘Facebook’ shkruan se ky proces vaksinimi po ecën me ritme shumë të mira. Ai ka ndarë foto nga procesi i vaksinimit gjatë së martës në disa qytete të vendit, dhe rikujton qytetarët se stafet mjekësore do të jenë në shërbim deri në orën 20:00 në qendrat e vaksinimit. Kryeministri u bën thirrje qytetarëve të paraqiten me kartë identiteti në pikën më të afërt të vaksinimit. Më herët gjatë ditës Shefja e Departamentit të Epidemiologjisë dhe Sëmundjeve Infektive në ISHP, prof. Silva Bino u shpreh se vaksinimi i moshave më të reja është i rëndësishëm për rritjen e ndërgjegjësimit dhe shmangien e shpërthimeve epidemike të mundshme të variantit të ri Delta. Për dy ditë kanë prenotuar për të marrë dozën e vaksinës afro 25 mijë persona në e -albania. Gjatë gjithë procesit të vaksinimit në Shqipëri nuk është lejuar përzgjedhja e llojit të vaksinës. Edhe pse kishin prenotuar për tu vaksinuar ka pasur të rinj të cilët kur kanë mësuar se vaksina që përdorej ishte coronavac, kanë refuzuar ta bëjnë. Mësohet se ditë të hapura të vaksinimit do të ketë edhe herë të tjera për të bërë të mundur që përveç fashës moshore që është planifikuar të vaksinohen edhe persona të tjerë përtej kësaj moshë në mënyrë që të krijohet mbrojtje ndaj mutacionit delta apo varianteve që mund të vijnë. Deri më tani në gjithë vendin janë kryer mbi 950 mijë vaksinime kundër covid 19 që nga nisja e procesit në fillim të janarit.