Ulet çmimi i naftës dhe gazit në pikat e karburanteve në vend, ndërkohë benzina ka pësuar një rritje të lehtë të çmimit. Trendi rënës i çmimeve të karburanteve në vend, vjen si rezultat i çmimit të tregtimit të naftës në tregjet ndërkombëtare, ku një fuçi nafte tregtohet në nivelin e 106 dollarëve. Në mbledhjen e kësaj të shtune, bordi i transparencës vendosi çmimin tavan të tregtimit të karburanteve, i cili do të qëndrojë në fuqi deri në mbledhjen e ardhshme të anëtarëve të bordit. Në pikat e tregtimit me pakicë të karburantit në vend, çmimi i naftës duke filluar nga kjo e shtunë, kushton 3 lekë më pak. Qytetarët do të mund të blejnë një litër naftë për jo më shumë se 232 lekë. Benzina do të tregtohet me një çmim tavan prej 212 lekë për liter. Ndërkohë çmimi i gazit u vendos 9 lekë më pak, duke arritur në nivelin e 104 lekë për litër, për të cilën konsumatorët familjarë nuk paguajnë më akcizë.