Ministria ukrainase e mbrojtjes tha të premten se kishte humbur aksesin në detin Azov përkohësisht, pasi forcat pushtuese ruse po forconin rrethimin e qytetit port Mariupol. “Pushtuesit ia kanë dalë pjesërisht mbanë të privojnë përkohësisht aksesin e Ukrainës në detin Azov”, tha ministria ukrainase e mbrojtjes në një deklaratë pa specifikuar nëse forcat ukrainase, e kanë rifituar apo jo aksesin në det... Rusia tha një ditë më parë se trupat e saj po forconin rrethimin mbi Mariupol, ku rreth 80 për qind e qytetit është rrënuar e më shumë se 1 mijë persona mbeten të bllokuar në vendstrehimin e improvizuar nën teatrin e bombarduar. Mariupoli, me pozicionin e tij strategjik në brigjet e detit Azov, ka qenë shënjestër që nga fillimi i luftës më 24 shkurt, kur presidenti Putin nisi atë që e quan operacion të posacëm ushtarak. Qyteti ndodhet në trajektoren mes gadishullit të aneksuar nga Moska të Krimesë drejt perëndimit dhe ka rajonin e donetskut në lindje, që kontrollohet nga separatistët pro rusë.