Pas notës së protestës të dërguar nga Athina zyrtare ndaj Kievit, Ministria e Jashtme e Ukrainës ka reaguar për herë të parë për dronin detar pa pilot që u zbulua në një shpellë para 4 jasvësh pranë ishullit grek Lefkada, nga disa peshkatarë. Brenda mjetit u gjetën tre detonatorë dhe një sasi lënde shpërthyese, prej gati 300 kilogramësh. Zëdhënësi i Ministrisë së Jashtme ukrainase, Heorhii Tykhyi, ka shprehur keqardhje për incidentin, ndërsa ka theksuar se ai ishte pasojë e rrethanave të krijuara nga agresioni i vazhdueshëm rus kundër Ukrainës. Zyrtari ukrainas thotë se siguria ndërkombëtare dhe detare, si edhe aktiviteti i “flotës në hije” ruse, përbëjnë shqetësim të përbashkët për Greqinë dhe Ukrainën dhe se për këtë arsye, Ukraina mbetet e përkushtuar ndaj respektimit të së drejtës ndërkombëtare dhe sigurisë së lundrimit civil, duke shprehur dëshirën që incidente të ngjashme të mos përsëriten në të ardhmen. Në deklaratën e tij, ai falënderoi Greqinë dhe popullin grek për mbështetjen e vazhdueshme ndaj Ukrainës që nga fillimi i pushtimit rus. Sipas raportit të Shtabit të Përgjithshëm të Forcave të Armatosura Greke, droni mund të ketë rënë nga një anije që lundronte në rajon, dhe se opbjektivi I tij mund të ketë qenë të ashtuquajturat ‘“flotë në hije” ruse, konkretisht anije që dyshohet se transportonin naftë ruse në Mesdhe. Athina ka deklaruar se nuk do të lejojë zhvillimin e operacioneve ushtarake në rajonin e Mesdheut dhe veçanërisht pranë territorit grek.