Presidenti amerikan Donald Trump deklaroi se një vaksinë kundër Covid 19 mund të jetë gati brenda tre apo katër javësh. Edhe pse disa zyrtarë të lartë të shëndetësisë në SHBA tërheqin vëmendjen e thonë se duhet bërë kujdes të mos përshpejtohen proceset, shefi I shtëpisë së bardhë këmbënguli se janë shumë pranë prodhimit të vaksinës. Ai e mohoi nga ana tjetër të ketë nënvlerësuar seriozitetin e sëmundjes, edhe pse në një intervistë të regjistruar me herët e kishte lënë të kuptohej një gjë e tillë. “Nuk e kam minimizuar seriozitetin e virusit. Në fakt, në shumë mënyra, e kam mbivlerësuar për sa u përket veprimeve. Veprimet e mia kanë qenë shumë të fuqishme”, tha Trump, duke përmendur ndalimin e udhëtimit për personat nga Kina dhe Europa, në fillim të këtij viti. “Do të kishim humbur mijëra njerëz më shumë pa vendosjen e atij bllokimi. Kemi shpëtuar shumë jetë me atë veprim”, shtoi ai. Në librin e ri të gazetarit veteran, Bob Woodward, thuhet se Trump e ka minimizuar qëllimisht seriozitetin e kërcënimit nga COVID-19 në deklaratat e tij publike gjatë muajve të parë të pandemisë.